Ǫllum mǫnnum þeim sem þetta bréf sjá eða heyra, senda Atli prestr at Krosskirkju, Ólafr prestr Þórðarsun, Pétr á Sandvin, Þórsteinn Þórbjarnarsun kveðju guðs ok sína.
Vér viljum yðr kunnigt gera at vér várum þar í hjá er þeir brǿðr Arni mattr ok Sørkvir bróðir hans, synir Bárðar í Mattri, seldu Pétri Pálssyni á Auðastǫðum jǫrð þá er Steinslétta heitir, fjǫgurra mánaða mataból með ǫllum þeim hlunnendum er þar hafa til legit frá fornum ok nýjum, bǽði á sjó ok á landi. Seldu þeir Pétri ok svá mikit sem þeir áttu í nótarverpi þí er liggr við ósinn á Miklabólstað er liggr í Skálakirkjusókn, hvárttveggja fyrr nefnt, fyrir 11 merkr brenndar. Skal Pétr eiga jǫrð ok þessi hlunnendi er fyrr segir 20 vetr, en liðnum 20 vetrum ef þeir vilja aftr leysa. Skulu þeir brǿðr segja Pétri fyrir fé sínu fyrir jól ok útan brigðar aftr leysa.
Þessum fleirum mǫnnum hjá verǫndum: Bárði Dagssyni, Ormi á Fit, Nikulási kumpra, Sigurði Eiríkssyni á Eyðvin.
Var þetta kaup gǫrt um várit í fǫstudaginn nǽsta fyrir pétrsmessu í Bjǫrgvin í meistarahúsum á fimmtánda ári ríkis virðuligs herra Hákonar konungs. Ok til sanns vitnisburðar settum vér fyrr nefndir menn vár innsigli fyrir þetta bréf.